மூன்றாவதுகண்

அக்குறும்பு - கோவி.கண்ணன்

2006-12-07T22:37:00.000-08:00

குறும்பு பற்றி முதலாவதாய் வந்திருக்கும் கதை நடையில் ஒரு நிகழ்வு. இந்தக் கால பசங்ககிட்ட பெற்றோர்கள் என்ன எதிர்பார்க்கணும், எப்படி நடக்கணும் என்பதைக் குறிப்பால் உணர்த்துகிறார்.

கருத்து என்னவோ நன்றாக இருந்தாலும், சற்று அலுப்புத் தட்டுகின்ற கதை நடை, டாகுமெண்டரி பார்ப்பது போன்ற உணர்வைத் தருகிறது.

கதையில் சிறப்பு குறும்பு: ஆசிரியரின் பின் குறிப்பு:

"பின்குறிப்பு : என்ன அக்குறும்பா இருக்கு கதையில்(?) 'குறும்பையே' காணுமே ? ஹலோ ! காலேஜ் படிக்கிறப்ப, தண்ணி அடிக்கிறது, தம் அடிக்கிறது, சைட் அடிக்கிறது, முதல் காட்சி பார்க்கிறது - இது எல்லாம் குறும்பு இல்லாமல் வேறு என்னவாம் ?:):)"

செந்தில் குமரனின் குறும்பு - 1

2006-12-04T23:11:00.000-08:00

'சின்னச் சின்ன ஆசை..சிறகடிக்க ஆசை' ன்னு பாடினது போல, அந்தந்த பருவங்களில், செய்த குறும்புகளின் நினைவலைகளை அழகாய் கிராமிய நடையில் எளிமை பட வடித்திருக்கிறார்.

இடைச்செருகல் ஏதுமின்றி, இயல்பு நடையில் கவிதையின் ஓட்டம் இருப்பது சிறப்பு.

காலைல போன புள்ள

காணலையேன்னு வீட்டிலதான்

அப்பனாத்தா கவலை கொள்ள

ரெண்டு ரூபா பந்துமா

தென்னை மட்டை பேட்டுமா

இருட்டியும் தெரு லைட்டோரமா

வெள்ளந்தியா விளையாண்டு பறந்த

காலந்தான் மறக்கவில்லை

அழகாய் பெற்றோர் மனதையும், அந்தச் சூழலையும் காட்சியாய் நிறுத்தி இருக்கிறார்.

"வெள்ளந்தித்தனம் மறந்(த்)து போன

இன்னைக்கும்

வெள்ளந்தியா சுத்தி வந்த

காலம் மட்டும் மறக்கவில்லை"

குறும்பு - 1 என்று துவக்கியிருக்கிறார், இன்னும் தொடரலாம்.

எளிய கிராமிய நடையில் அழகாய் ஒரு கவிதை.

சிவமுருகனின் குறும்பு

2006-12-04T22:48:00.002-08:00

குறும்பு என்ற சொல்லை வைத்து 'விசு'த்தனமான ஒரு ஆரம்பத்துடன் துவங்குகிற கட்டுரை, 'குறும்பு என்றால் என்ன?' என்ற விளக்கத்துடன் பயணிக்கத் துவங்கி, விளைவுகளை சுட்டி, வகைகளை வகைப்படுத்தித் தொடர்ந்திருக்கிறார்.

'விண்வெளி வீரர் கூட சர்ச்சுக்குப் போனபின்புதான், விண்கலம் ஏறுகிறான்' என்று கவியரசரை மேற்கோள் காட்டி, குறும்பை வெளிப்படுத்துகிறார்.

கட்டுரையின் நடை ஆய்விற்கு/பரீட்சைக்கு எழுதப்படும் நடை போலிருப்பதால், சுவாரஸ்யம் குறைவாயிருப்பதுபோல் தோற்றம்?.

தொடர் பதிவு போல் தெரிகிறது, இன்னும் வர இருக்கின்ற பதிவுகளையும் பார்த்து, விமர்சனத்தைத் தொடரலாம்.

குறும்பு - நாமக்கல் சிபி

2006-12-03T12:18:00.000-08:00

குறும்பு-ன்னாலேயே யோசிக்காம எல்லாருக்கும் உடனடியாக நினைவுக்கு வருவது, குழந்தைகளின் குறும்புத்தனம்தான்.

அது இந்தக் கவிஞருக்கும் வந்ததில் ஆச்சரியமில்லை. கவிதையின் ஆரம்ப வரிகள் காதலனைக் குறி வைத்து நகர்வது போல நகர்த்தி, இறுதியில்

"என் கரு சுமந்த

என் உயிர் நீயே!

உன் குறும்புகளாலே

உயிர் தருவாயே" என்று சொல்லி, குழந்தையை கண்முன் நிறுத்துகிறார்.

கவிதையின் பாணியும், வரிகளின் தொணியும், இதே அலை வரிசையில் ஏற்கனவே படித்த கவிதைகளை நினைவுறுத்துவது போலிருப்பது ஒரு குறை.

தாயின் பார்வையிலான குழந்தைக் குறும்பை இன்னும் கொஞ்சம் அழுத்தமாகச் சொல்லியிருக்கலாம்.

நாமக்கல் சிபியின் குறும்பு - பிறை நிலவு.

ஹிந்தி ஒயிக.. எக்சாம் ஹால் அக்குறும்பு

2006-12-02T00:22:00.000-08:00

குறும்பாய் எழுதச் சொன்னாலும் சொன்னாங்க, அரை பிளேடு செம ஷார்ப்பா ஒரு பிளேடு போட்டிருக்கார். நல்ல காமெடி போங்க.

ஹிந்தி பரீட்சை எழுதப் போய், 'ச்சீ..ச்சீ..இந்தப் பழம் புளிக்கும்'னு ஹிந்திக்கு 'பைபை' சொன்னதை, சென்னைச் செந்தமிழிலில் கதைத்திருக்கிறார்.

"சூப்பர் வைசரு அட்டய வாங்கி புரட்டி பொரட்டி பாத்து முயிக்கிறாரு. அவருக்கு இந்தி தெரியாது போல"

ஹிந்தி ஒயிக... - ஒரு லைட்டர்சென்ஸ் காமெடி.

தேன்கூடு போட்டி - பக்தர்கள்

2006-12-01T23:50:00.000-08:00

குறும்பு என்று அழகாகத் தலைப்பு கொடுக்கப் பட்டிருப்பதற்கும், இந்தக் கவிதைக்கும் என்ன சம்பந்தம் என்று படைப்பாளர் விளக்கம் கூறினால், நன்றாக இருக்கும்.

தத்துவார்த்தமாக வரிகள் இருந்தாலூம், கோர்வையாய் இல்லாதது போன்ற உணர்வு.

சிறப்பாய்ச் சொல்ல ஏதுமில்லை. இணைக்கப் பட்டிருக்கின்ற புகைப்படம் நன்றாயிருக்கிறது.

பக்தர்கள் - சுமார்.

குறும்பு - டிசம்பர் 2006 தேன்கூடு போட்டி - விமர்சனங்கள்

2006-12-01T23:48:00.000-08:00

தேன்கூடு போட்டிக்கான விமர்சனங்களைக் காண:

பக்தர்கள் - சுமார்
ஹிந்தி ஒயிக.. எக்சாம் ஹால் அக்குறும்பு - லைட்டர்சென்ஸ் காமெடி
குறும்பு - நாமக்கல் சிபி - பிறை நிலவு
குறும்பு - சிவமுருகன்

"குறும்பு"

2006-11-30T20:12:00.000-08:00

தேன்கூடு போட்டிக்கு தலைப்பு அறிவிச்சாச்சு. நல்ல முகவுரையுடன், அலெக்ஸ் கொடுத்து இருக்கிற தலைப்பு "குறும்பு"

கடைசிப் போட்டி ஜாலியா இருக்கணும்ங்கிற நினைப்புல, ஜாலியான தலைப்பைக் கொடுத்து இருக்கிறார்.

குறும்பர்கள், தங்கள் கற்பனைத்திறனை வெளிக்கொணரட்டும்.

எந்தக் குறும்பு எல்லோரையும் கவரப்போகுதுன்னு பொறுத்திருந்து பார்க்கலாம்.

பதிவர்களே, பதியத் தொடங்குங்கள். தேன்கூட்டில் படைப்புகள் வரவர நாங்களும் கருத்துச் சொல்ல காத்திருக்கிறோம்.

அட்வான்ஸ் வாழ்த்துக்கள்!!!!

தேன்கூடு போட்டி - கடைசியா?

2006-11-30T01:04:00.000-08:00

எத்தனை பேருக்கு இந்த 'மூன்றாவது கண்'-ஐ ஞாபகம் இருக்கும் என்பது தெரியவில்லை.

இருப்பினும், இப்போது நினைவு படுத்திக் கொள்ளுங்கள். தேன்கூடு போட்டியின் படைப்புகளுக்கு, முதன் முதல் விமர்சனம் என்ற ஒன்றைத் துவக்கியதே இந்த 'மூன்றாவது கண்' -தான்.

ஆரம்பத்தில் இந்த எண்ணத்திற்கு எதிர்ப்புகள் இருந்தது. அந்த எதிர்ப்பினையே வலைப்பதிவர் முன்னிறுத்தி, பதிந்திருந்தோம். பார்க்க.

அந்த முகமிலி அதற்குப் பிறகு எங்கே அந்த முகத்தைத் தொலைத்தார் என்று தெரியவில்லை. ஆனால், இந்த விமர்சனங்கள், வலைப்பதிவரிடையே வரவேற்பைப் பெற்றதும், தொடர்ச்சியாய் விமர்சனங்கள் கடந்த போட்டிவரை யாராவது ஒருவரால், தொடரப் பட்டு வந்தது.

எல்லோராலும், தொடர முடியாது போனதற்கு, படைப்புகளின் எண்ணிக்கையும் ஒரு காரணம். அதற்காகத் தேவைப்படும் நேரமும் ஒரு காரணம், என்பதனை எங்களால் உணரமுடிகிறது.

இந்தப் போட்டியோடு, தேன்கூடு போட்டியை நிறைவு செய்யப் போகிறார்களாம் என்பது செய்தி.

போட்டி முறை குறித்து சலசலக்கப்படும் அதிருப்தி காரணமா இல்லை இதை முறைப்படுத்திச் செய்ய வேண்டிய பணியின் பளு காரணமா தெரியவில்லை. எதுவாயினும், இது ஒரு இழப்பாகவே இருக்கும் என்று படுகிறது.

இது வலைப்பதிவரிடையே ஒரு பெரிய செய்தியாகப் படாதது, ஆச்சரியம். ஏனோ தெரியவில்லை, இது குறித்து எந்த வலைப்பதிவாளரும் பெரிதாய்க் கவலைப்பட்டதாகத் தெரியவில்லை.

எது எப்படியாயினும், நாங்கள் ஒரு முடிவோடு இருக்கிறோம். ..ஆமாம், இம்முறை போட்டிக்கு விமர்சனம் எழுதுவதென்று.

சிறில் அலெக்ஸும், தேன்கூட்டிற்கு தலைப்புக்களை அனுப்பியிருப்பதாகச் சொல்லியிருக்கிறார். புதிய போட்டிக்கான தலைப்பு, இன்று அறிவிக்கப் படலாம்.

நீங்கள் உங்களைச் சுறுசுறுப்பாக்கிக் கொள்ளுங்கள், புதுப் படைப்புகளைத் தர. நாங்களும் தயாராகிறோம், விமர்சிக்க.

மீண்டும் நாளை பார்க்கலாம்...

தேன்கூடு-ஜீலை மாதப் போட்டி

2006-07-19T00:58:00.000-07:00

தேன்கூடு ஜீலை மாதப் போட்டி கன ஜோராய் களை கட்டிப் போய்க்கொண்டிருக்கின்றது. இன்றோடு படைப்ப்புகள் வந்து சேர கடைசி நாள் முடிகிறது. 'மரணம்' என்கிற அவலச் சுவை படைப்புக்குரிய தலைப்பாக 'இளவஞ்சி'யார் கொடுத்திருந்தாலும், படைப்பாளிகள் அசராமல், அள்ளித் தெளித்திருக்கிறார்கள். எல்லாவற்றையும் படித்துக் கருத்துச் சொல்ல ஆசைதான்! ஆனால், அலுவல் காரணமாய் நாங்கள் ஒவ்வொருவரும் ஒவ்வொரிடம் மாட்டிக் கொண்டமையால், இம்முறை விமர்சிப்பது இயலாத காரியமாகிவிடுகிறது. வாசகர்களும், படைப்பாளிகளும் பொறுத்தருள வேண்டும். சென்றமுறை போல், இம்முறையும் போட்டித் தலைப்பாசிரியர் எல்லாப் படைப்புகளுக்கும் முன்னுரை வழங்குவார் என்று எண்ணுகிறோம். அது வாக்களிக்க வருவோருக்கு மிகப் பயனுள்ளதாக இருக்கும் என்பது எங்கள் எண்ணம்.

அனைத்துப் படைப்பாளிகளுக்கும் எங்கள் வாழ்த்துக்கள்!

மீண்டும் சந்திப்போம் அன்பர்களே!

தேன்கூடு - போட்டி முடிவுகள்

2006-06-25T22:59:00.000-07:00

விடலைப்பருவத்தினை முன் நிறுத்திக் கொடுக்கப்பட்ட தலைப்பினுக்கேற்ப, கலகலப்பாக முடிந்தது போட்டி. 34 படைப்புகள் என்பதும் ஒரு மிகப்பெரிய விசயம். அதுவும் கடைசி இரண்டு தினத்தில் 12 படைப்புகள், என அசுர வேகத்தில் அசத்தினார்கள்.

வலைஞர்களிடையே ஒரு எழுத்தார்வத்தையும், பங்களிப்பையும் தோற்றுவிக்க உதவிய 'தேன்கூடு-தமிழோவியத்திற்கும்', எளிதில் எல்லோரும் பங்கு கொள்ளும் விதமாய் தலைப்பினைக் கொடுத்து உதவிய 'பினாத்தல்' சுரேஷ் அவர்களுக்கும் எங்கள் வாழ்த்துக்கள்.

பரிசு பெற்ற போட்டியாளர்களான இளவஞ்சி, உஷா, நிலா மற்றும் ராசா-விற்கு வாழ்த்துக்கள்!

1. விட்டில் பூச்சிகள் - முழு நிறைவு! - இளவஞ்சி
2. ..25, ..50, ..75, ..00, ..25 - நேர்த்தியான கதைப்பின்னலில் - உஷா
3. மனமுதிர் காலம் - பழைய கள், புதிய மொந்தையில்.. - நிலா
4. மாறித்தான் ஆகனுமா? - இயல்பான நடையில் - ராசா

(போட்டி முடிவுகளின் முழு விபரம் காண - செல்க தேன்கூடு)

பரிசு கிடைக்கப்பெறாத பங்களிப்பாளர்களுக்கும் எங்கள் வாழ்த்துக்கள், தரமான படைப்புகளை தந்தமைக்கு. இந்த போட்டி சில புதிய வலைஞர்களின் எழுத்துக்களை அடையாளம் காண உதவியிருக்கிறது. பரிசு கிடைக்கவில்லை என முயற்சியைக் கைவிடாது, மேலும் வலுவோடு வரும் போட்டிகளில் பங்கேற்க வாழ்த்துக்கள்.

'மழை விட்டும் தூவானம் விடவில்லை' என்பது போல, போட்டிக்கான இறுதி நாள் முடிந்த பின் 'யாத்ரீகனின்' "வளர்சிதை மாற்றம்" வெளியானது. சற்றே மாறுபட்டுச் சிந்தித்திருந்தார். "பந்திக்கு முந்து, படைக்குப் பிந்து" என்று பரிமாற முன்னே வந்திருக்கவேண்டியவர், சற்றே பின் தங்கிவிட்டாலும், இறுதியில் பரிமாறப்படும் 'டெஸர்ட்' போல இனிதாகவே இருந்தது.

ஒரு 'கனாக் கால' போட்டி, இனிதே நிறைவுற்றது!

அனைவருக்கும் வாழ்த்துக்களுடன்,

- மூன்றாவதுகண் குழு

ஒரு புள்ளியிலிருந்து தொடங்க!

2006-06-22T08:01:00.000-07:00

தேன்கூடு தமிழ் போட்டியில், பங்கு பெறும் கதை/கட்டுரைகளின் விமரிசனங்களைக் காண, கீழ் கண்ட URL மீது 'கிளிக்' கிடவும். விமரிசனங்களைப் படித்த பின் அங்கிருந்து, கதைகளுக்குச் செல்ல, அங்குள்ள கதைத் தலைப்பின் URL மீது 'க்ளிக்' செய்யவும்.

மேலதிக விபரங்களுக்கு

1.கனா காணும் காலம் - சற்றே குழம்பிய நிலையில்.

2.காதல் வளர்சிதை மாற்றம் - வார்த்தை ஜாலத்தில்!.

3.விடலைக் காலத் தளைகளே போ போ போ - சோகத்தின் நிகழ்வில்

4.வளரிளமைக் காலம் - தகவல் திரட்டு!

5.முற்றுப்புள்ளி - முழுப்புள்ளி அல்ல

6.பைபை அடாலசன்ஸ் - இளமை

7.மாறித்தான் ஆகனுமா? - இயல்பான நடையில்

8.தகிக்கும் தேகம் - விடலையின் கிளுகிளுப்பில்!

9. ..25, ..50, ..75, ..00, ..25 - நேர்த்தியான கதைப்பின்னலில்

10.அன்புள்ள டைரி - படிக்க சுவாரஸ்யம்

11.விடைகொடு விடலைப் பருவமே.. - கனித்தமிழில்.

12.எனக்கு நேர்ந்த வளர்சிதை மாற்றங்கள் - Nothing Special!

13.வளர்சிதை மாற்றம் - உணர்ந்து கொண்டேன் - ?

14.விட்டில் பூச்சிகள் - முழு நிறைவு!

15.வளர்சிதை மாற்றம் - மெல்லிய கவியுணர்வில்.

16.'பொடிப்பையன்' - இலக்கிய நடை தோற்றத்தில்

17.மனமுதிர் காலம் - பழைய கள், புதிய மொந்தையில்..

18.பெரிய மனுஷி - இன்னும் விடலையாகவே

19.ராஜாக்கா பாவா - காட்சி பலத்தில்!

20.ஒரு முன்னாள் விடலையின் நினைவுக் குறிப்புகள் - நம்பிக்கையின் பலம்

21.ஜன்னலோர கவிதைகள் - நளினம்.

22.பிம்பம் - மாயை

23.சிற்பியே உன்னைச் செதுக்குகிறேன் - கல்லூரிக் கலாட்டா

24.இரவு - விடியலை நோக்கி

25.கொப்பரைத்தாத்தா - உந்துசக்தி!

26.நான் அப்பாவாகப் போகிறேனா ? - சம்பவக் கோர்வை.

27.நினைவெல்லாம் நான்.... - முதிர்வின் இளமை

28.பெரிய மனுஷன் - பெரிய மனுஷந்தான்

29.He-She: bye-bye adolescence - உல்லாச வேடிக்கை

30.வளர் சிதை மாற்றம் - 'அறிவியல்' தகவலுடன் ஒரு கவிதை.

31.தொட்ட இடம் மலரும் - மென்மை.

32.விடலைப்பருவம் விடைபெறும் தருணம் - மரபுக்கவிதையில்

33.மனமுதிர் பருவம் - கவிச்சிந்தனை

34.வாலிபமே வா வா - பறக்கத் துடிக்கும் பட்டாம்பூச்சி!

மேலதிக விபரங்களுக்கு

வாலிபமே வா வா

2006-06-22T01:50:00.000-07:00

வாலிபமே வா வா

சென்ற காலப் பெண்ணின், மனத்தோன்றலாய் வரையப்பட்டிருக்கும் கவிதை!

பள்ளித் தோழர்கள் பாவிகளாக்கப் பட்டனர்

பள்ளி செல்லும் பாதை பரிசீலிக்கப்பட்டது

பள்ளி செல்வதே கேள்விக்குரியானது!

வயதுக்கு வரும் பருவம் என்றழைத்து

சிறு மலரின் சிறகுகளைப் பிய்த்துவிட்டு

பூ மலரும் நாளுக்கான முன்னேற்பாடாம்

வாலிபமே வா வா - பறக்கத் துடிக்கும் பட்டாம்பூச்சி!

மனமுதிர் பருவம்

2006-06-22T01:44:00.000-07:00

மனமுதிர் பருவம்

கவிப்பிரவாகமாய் 'விடலைப்பருவம்' மனமுதிர் பருவமாய் இன்னொரு கவிதை வடிவில்.

அழகின் அழகாய் தன்னைப் பார்க்கும்

ஆயிரமாயிரம் நேரம் போக்கும்

வழமைஅழகை வெளியில் தேடும்

உள்ள அழகை உணராப் பருவம்.

போற்றிடும் இலக்கை நோக்கும்

பொறுமையால் வெற்றி சேர்க்கும்

ஆற்றலுயர் இளையர் கூட்டம்

அவனியிலே ஒளியைக் கூட்டும்

மனமுதிர் பருவம் - கவிச்சிந்தனை.

விடலைப் பருவம் விடைபெறும் தருணம்

2006-06-22T01:36:00.000-07:00

விடலைப் பருவம் விடைபெறும் தருணம்
இனைக்குறள் ஆசிரியப்பா-வில் ஒரு மரபுக்கவிதை புனைந்திருக்கிறார்!

இன்றைய உலகில் இளைஞரின் தேவை

நுன்னிய கல்வியும் நுட்ப மதியும்

அதைப்பெறும் பருவம் அவதிப் பருவமாய்

திசையும் திருப்ப தீக்குழி ஆசைகள்

காதலும் வீரமும் கவர்ந்திடும் கண்ணிகள்

சோதனை செய்திடும் சோகத்தில் வீழ்த்திடும்.

அந்தோ மாந்தருக்கு இப்போது அல்லவா

சொந்தமாகும் எதிர்காலம் எழுதவும் படுகிறது!

திருமணம் வந்திடும் திசையெலாம் மாறிடும்.

விடலைக் குணங்கள் இதன்பின்னும் தொடர்ந்தால்

விரைவில் வந்திடும் விவாகரத்தும்தான்

விடலைப்பருவம் விடைபெறும் தருணம் - மரபுக்கவிதையில்

தொட்ட இடம் மலரும்

2006-06-22T01:20:00.000-07:00

தொட்ட இடம் மலரும்

தனக்குப் பிடித்த பெண், தன்னைத்தான் காதலிக்கிறாள் என்ற உணர்வில் இருக்கும் இளைஞனை, தனியாய்ச் சந்திக்க அதே பெண் அழைக்க, ஏற்கனவே உருகியிருக்கும் அவன், எதற்காய் இருக்கும் என் இனம் புரியாது தவிக்கிறான். சந்திக்க அழைத்த பெண், கடைசியில் அவன் கூட இருக்கும் நண்பனைக் காதலிப்பதாகச் சொல்ல, 'விட்டுக் கொடுத்தலும் காதல்தான்' என்ற உணர்வோடு அவன் காதல் சிதைகிறது.

காதல் என்றால், கவித்துவமான வார்த்தைகள் தானாகவே வரும் போலும், அதற்கேற்றவாறு, நாயகியின் பெயரும் கவிதா.

தொட்ட இடம் மலரும் - மென்மை.

வளர் சிதை மாற்றம்

2006-06-22T01:11:00.000-07:00

வளர் சிதை மாற்றம்

வளர்சிதை 'மாற்றம்' வாழ்த்தி ஒரு கவிதை. 'மாற்றங்கள் மாத்திரமே நிரந்தரம்' என்ற இயல்பியலை வரிவரியாய் உணர்த்தி

உருவங்கள் மாறும்

உருவகங்கள் மாறும்

மாற்றம் மட்டுமே

எப்போதும் மாறாத தேற்றம்.

மாற்றம் என்பது வளர்ச்சி

அதுவே மானிடத்தின் உயர்ச்சி

என்று வளர்சிதை மாற்றம் வாழ்த்துகிறார்.

வளர் சிதை மாற்றம் - 'அறிவியல்' தகவலுடன் ஒரு கவிதை.

He-She: bye-bye adolescence

2006-06-22T00:57:00.000-07:00

He-She: bye-bye adolescence

போட்டிக்கு இறுதிக்கு வரும் பதிவுகளில், முன் வந்த பதிவுகளின் தாக்கமிருக்கும் என்ற சிந்தனையைத் தகர்த்து, வித்தியாசமான முயற்சியில், லேசான பதிவு, ரசிக்கும் விதமாய்.

தனக்கென ஒரு ஆள் இருந்தும், பக்கம் நோக்கும் 'He'க்கும், அதற்கு சரியாய் பதிலடி தந்து, 'He'-யை தன் கஸ்டடிக்கு கொண்டு வரும் 'She'.

"She : நான் எதுக்கு அவங்கள நிறுத்தச்சொல்லனும்? நான் நிறுத்த வேண்டியத நிறுத்திக்குறேன். அப்பறம் பார்போம்.
He : ஙே!..."

வாசகர்: வளர்சிதை மாற்றம் - விடலைப் பருவம் - மாறும்தருணம்.. இதெல்லாம் எங்க?
He: அட நீங்க வேற..'நிறுத்த வேண்டியத, நிறுத்தாம பாத்துகிட்டதுக்கப்புறம் வந்து சொல்றேன்..

:)

He-She: bye-bye adolescence - உல்லாச வேடிக்கை

பெரிய மனுஷன்

2006-06-22T00:45:00.000-07:00

பெரிய மனுஷன்

'வாவ்' என்று சொல்லி, அதிசயிக்கும் விதமாய் ஒரு பதிவு.

'விடலையில்தான் எவ்வளவு நல்ல விசயங்களும் இருக்கின்றன' என எண்ணும் விதமாய், ரசனையாய் ஒரு பதிவு.

படிக்கின்ற வாசகர், தமக்கொரு தங்கையில்லையே என வருந்தும் விதமாய், குதூகலக் குறும்புகளுடன் பதிக்கப் பட்டிருக்கிறது. நல்லதொரு குடும்பச் சூழலில், வித்தியாசமான கோணத்தில் பதிந்திருக்கிற வளர்சிதை மாற்றம்!

பெரிய மனுஷன் - பெரிய மனுஷந்தான்!

நினைவெல்லாம் நான்....

2006-06-22T00:32:00.000-07:00

நினைவெல்லாம் நான்....
"தாமரை இலையில் விழுந்த தண்ணீர் முத்துக்கள் சிறு துளிகளாகி, பின்னர் வழுக்கி ஒடி, இன்னொரு துளியுடன் சேர்ந்து சற்று பெரியதாகி மீண்டும் இன்னொன்றுடன் சேர்ந்து இன்னும் பெரியதாகி கடைசியில் இலையின் நடுவில் பெரியதொரு முத்தாய் இருக்குமே அது போல,நாட்கள் வாரமாய், மாதமாய் உருண்டோடி 30 வருடங்களாகி விட்டன. " - உவமையின் அழகோடு புறப்படுகிற கதை, முதிர்வில் கனவாய் தன் இளமையின் காலத்தை இயல்பாய் அசைபோடுகிறது.

"எனக்கு வளர்சிதை மாற்றம் ஏற்பட்டதோ இல்லையோ, எனக்குத் தெரியவில்லை. ஆனால் நான் வளர்ந்து, சிதைந்து (மாறிப் ) போய் தான் இருக்கிறேன். எனக்கு வேண்டியதை என் அப்பா தீர்மானித்தார். தனக்கு வேண்டியதை என் மகன் தீர்மானிக்கிறான்" என காலத்தின் மாறுதலை, தெளிவாய்ச் சுட்டுகிறார்.

நினைவெல்லாம் நான்.... - முதிர்வின் இளமை

நான் அப்பாவாகப் போகிறேனா ?

2006-06-22T00:15:00.000-07:00

நான் அப்பாவாகப் போகிறேனா ?

விடலையின் ஆரம்பகால மீசை அழகில் லயிப்பது, குரல் மாற்றம், தங்கையின் தோழர்கள் வில்லனாவது என அழகாய் அடுக்கிக் கொண்டே போய், அப்பாவின் உயர்குணங்கள் பால் ஈர்க்கப்பட்டு, தானும் நல்ல அப்பாவாக வேணும் என ஆவலுறுகிறார்.

நான் அப்பாவாகப் போகிறேனா ? - சம்பவக் கோர்வை.

கொப்பரைத்தாத்தா

2006-06-21T23:57:00.000-07:00

கொப்பரைத்தாத்தா

கல்லூரி படிக்கும் இளைஞன், பந்தா பரமசிவம் போன்ற நண்பர்களின் தூண்டலில், அப்பா வைத்திருக்கும் பைக்கினை ஊர் கல்லூரிக்குப் போக என்று கேட்டு வாங்கி, 'கட்' அடித்து ஊர் சுற்றுகிறான். 'தல' படம் பார்த்து, தலகால் புரியாத மிதப்போடு, பைக்கில் வலம் வர, கொப்பரைத்தாத்தாவைப் பார்க்கிறான். தன் காலிலேயே நிற்க வேண்டும் என்ற பிடிப்போடு, அறுபது+ லிலும், விடாது உழைப்பவர், (அதுக்காக 120 கீ.மீ சைக்கிளிலேயே பயணித்திருப்பது சாதனைதான், சாதனைத்தாத்தா!) அவரைக் கண்டவுடன்,

"அறுபது வயசுக்கிழவன் இவ்வளவு தூரம் வந்து உழைக்கவேண்டிய அவசியம் இல்லாதிருந்தபோதிலும் உழைக்கிறார். இருபது வயசுப்பையன் பந்தாவுக்காக வண்டியில பறக்கிறோமே என்ற எண்ணம் ஓடியது. அதேநேரம் நம் அப்பா இந்த வெய்யிலில் அலுவலகத்திற்கு சென்று வர மறுபடி சைக்கிளுக்கே திரும்ப வைத்ததை நினைத்து வேதனைப்பட்டேன்", உணர்ந்து மாறுவதாக முடிகிறது கதை.

விடலையிலும், மேன்மையாய்ச் சிந்திக்க முடியும் என்ற தூண்டலின் வெளிப்பாடு.

கொப்பரைத்தாத்தா - உந்துசக்தி!

இரவு

2006-06-21T23:36:00.000-07:00

இரவு

காமத்தைக் கட்டுக்குள் வைக்க நினைத்த இளைஞன், அதனை ஒரு இரவில் தொலைத்து விட்டு, மறுநாளிரவு ரயில் பயணத்தில் முந்தைய இரவினை அசை போட...வருத்தமா, சந்தோசமா என்று இனம் புரியாத நடையில் போகிறது.

இரவு - விடியலை நோக்கி.

சிற்பியே உன்னைச் செதுக்குகிறேன்

2006-06-21T23:24:00.000-07:00

சிற்பியே உன்னைச் செதுக்குகிறேன்
கல்லூரி வாழ்க்கையின் 'ராகிங்' கில் ஆரம்பித்து, நண்பர்களின் நட்பில் திளைத்து, சினிமா, பிகர் தேடல், டீக்கடை பெஞ்சில் அரட்டை என வழக்கமாய் நடக்கும் கல்லூரிக் கலக்களைக் கொண்டு தோரணம் கட்டியிருக்கிறார்.

சிற்பியே உன்னைச் செதுக்குகிறேன் - கல்லூரிக் கலாட்டா

பிம்பம்

2006-06-21T23:01:00.000-07:00

பிம்பம்

அம்மாவும், அப்பாவும் இனிமையாய் இருக்கும் தருணம், எதிர்பாராத விதமாக மகனின் பார்வையில் பட, அம்மாவை அக்கோலத்தில் கண்ட மகனுக்கு, அம்மா மீது வெறுப்பு வருகிறது. பின்னர், படிக்கின்ற காலத்தில் இன்னொரு பெண்ணின் அருகாமை, அந்த சுகத்தினை அடையாளம் காட்ட, விடலை களைந்து, பெற்றோரின் மீதான வெறுப்பு களைகிறான். பிம்பம் மறைவதாக..

தலைப்பிற்கு ஏற்ற கதை, ஏதோ இருப்பது போல் தோன்றி, இல்லாததாகி விடுகிறது.

பிம்பம் - மாயை.

ஜன்னலோர கவிதைகள்

2006-06-21T22:02:00.000-07:00

ஜன்னலோர கவிதைகள்

அடாலசண்ட் நினைவுகளை அசைபோடுவதில், ஆண்கள் மட்டும்தான் வல்லவர்களா, பெண்களும் கூடத்தான் என்றுரைக்க, தன் ஜன்னலோர நினைவுகளை, அசைபோட்டிருக்கிறார்.

"எனக்கு எனனோட சிடுசிடுக்கும் ராணி மிஸ்ஸும், அவங்க கட்டியிருந்த லோஹிப் சேலையை பத்தி சொல்லனும், அவளுக்கு அவ பாய்ப்ரென்ட பத்தி சொல்லனும்.ரெண்டு பேருக்கும் ஒரு உயிருள்ள டைரி கிடைச்ச சந்தோஷம்"

பெண்களின் விடலையில், அழகுணர்வும் மற்றவர்களால் கவனிக்கப்பட வேண்டுமே என்ற ஆதங்கமும் முக்கிய பங்கு வகிக்குமே. அதையும் விடாது பதிந்திருக்கிறார்.

"காமினி என்னை ஒரு புதிய உலகத்துக்கு கூட்டிட்டு போனா. ஒரு பெண் தன்னை அழகாகிக்க எவ்ளோ செய்ய வேண்டியிருக்கு? ஒரு சின்ன நூல் வச்சு, ஒவ்வொரு புருவ முடியும் புடுங்கறது, யப்பா! சொல்லி மாளாது அந்த வலி. பட்டா தான் புரியும். அப்புறம், 'வேக்ஸ்ஸிங்'! வலி தாங்காம கத்திட்டேன். பட்டு தோலுக்கு, இன்னும் எவ்ளோதான் படனுமோ? இவ்வளவு பண்ணியும், "மாசரு பொன்னே"னு ஒருத்தரும் என்னை பார்த்து பாடலை."

விடலைக் காதலையும் 'அவன் பேசாத கவிதைகள் என் டைரி பக்கங்களை நிரப்பின' என்று நளினமாய்ச் சொல்கிறார். தமிழ் போட்டிக்கு முதல் முறை என்று சொல்லியிருக்கிறார், நடை பார்த்தால் அப்படி தெரியவில்லை.

ஜன்னலோர கவிதைகள் - நளினம்.

ஒரு முன்னாள் விடலையின் நினைவுக் குறிப்புகள்

2006-06-21T02:01:00.000-07:00

ஒரு முன்னாள் விடலையின் நினைவுக் குறிப்புகள்
நீளமான கட்டுரை என்று கொடுத்த எச்சரிக்கை மிகவும் பயன்பட்டது. சுருக்கமாக(சுருக்கநீட்டமாக :) ) ஒரு விடலையின் வாழ்க்கையினை பதிந்திருக்கிறார் ஆசிரியர். விரக்தி,வெறுமை,சோகம், காதல், பயம் என எல்லாவிதமான உணர்வுகளையும், வாசகரும் உணரும்விதமாய்ப் பதித்திருப்பது சிறப்பு.

தற்கொலைக்கு முயன்றதும், அதிலிருந்து தப்பியதும் அந்த எண்ணச் சூழலும் படிக்கின்றவர்க்கு பாடமாய் அமையவேண்டும்.

"எனக்கு மகள் பிறந்த பிறகுதான் என் வாழ்க்கையின் அர்த்தம் கிடைத்தாற் போலிருந்தது. குழந்தையிலிருந்து அவள் வளர்ச்சியை உன்னிப்பாக ஒரு தகப்பனாக ஆனந்தமாக கவனிக்கையில், இந்த சந்தோஷத்தையெல்லாம் இழந்து விட்டிருப்பேனே என்கிற உணர்வு தோன்றியது. அவளுடன் ஒரு குழந்தையாக மாறி கதவுக்குப் பின்னால் ஒளிந்து விளையாடுகிறேன்" - வசந்தத்தின் அழைப்பினை உணர்த்தும் வரிகள்.

ஒரு முன்னாள் விடலையின் நினைவுக் குறிப்புகள் - நம்பிக்கையின் பலம்.

ராஜாக்கா பாவா

2006-06-21T01:47:00.000-07:00

ராஜாக்கா பாவா

ராஜாக்கா எண்ணெயை ஊத்தி தற்கொலைக்கு முயன்று, ஆஸ்பத்திரியில் இறந்துவிட, ராஜாக்கா பாவா கூட்டம் மற்றும் குடும்ப்பத்தினரால், திட்டித்தீர்க்கப்பட, குமார் - ராஜாக்கா தம்பி பக்குவத்துடன் பாவாவை அனுகுகிறார்.

காட்சி ஆரம்பிக்கறதே பரபரப்பினைக் கூட்டிவிட, தொடர்ந்து தற்கொலைக்கு முயன்ற வீடு, மருத்துவ மனை என அங்கங்கே நடக்கும் காட்சியின் உரையாடலிலும் அந்த பரபரப்பினைத் தொடரவிட்டு, எதனால் தற்கொலைக்கு முயன்றாள், என படிக்கும் வாசகர்களிடம் ஆர்வத்தை தூண்ட விட்டு, "விடலைப்பருவம் - வளர்சிதை மாற்றம்' எல்லாம் மறக்கச் செய்துவிடுகிறார் கதையின் ஆசான். கடைசிவரிகளில், குமார் எப்படி தொலைத்தேன் என் விடலையை என்று கேட்கிற போதுதான் போட்டி நினைவிக்கு வந்து, குமார் விடலையில் என்ன செய்தார் என்று கேட்கத் தோன்றுகிறது!

ராஜாக்கா பாவா - காட்சி பலத்தில்!

பெரிய மனுஷி

2006-06-21T01:31:00.000-07:00

பெரிய மனுஷி

பெண் பூப்படைவதை மையமாகக் கொண்டு, அது குறித்த விடலைச் சகோதர சகோதரியரின் விவரமறியாச் சிந்தனைகளைச் சிதறவிட்டு, பெரிய மனுஷியானவுடன், எல்லாவற்றையும் பகிரும் தங்கை, அது குறித்து தன்னிடம் பகிராது விலகுவதை சகோதரன் அதிர்ந்து பார்ப்பதாக முடிகிறது கதை.

கதை என்று சொல்வதைவிட, விறுவிறுப்பான சகோதர சகோதரி வார்த்தையாடலாகவே போய்விடுகிறது. மனதில் நிற்கும்படியாய் எதுவும் இல்லாதது ஒரு குறை.

பெரிய மனுஷி - இன்னும் விடலையாகவே!

மனமுதிர் காலம்

2006-06-21T01:08:00.000-07:00

மனமுதிர் காலம்

என்னடா எல்லா கதயிலயும் பசங்களே சைட் அடிக்கறேன், தண்ணியடிக்கறேன்னு விடலைத்தனம் பண்ணிக்கிட்டு இருக்காங்கள, பொண்ணுங்க ஒன்னும் பண்ணலையேன்னு நினைச்சா..ரஞ்சனி மூலமா ஒரு பெண்மன விடலைப்பதிவு.

காதல் நாவல்களில் லயிக்கற ரஞ்சனிக்கு, யாரும் இல்லாத நேரத்தில் வீட்டுக்கு வர்ர அத்தை பையன் சுரேஷ் முத்தம் கொடுத்து காதலைத் துவக்கி வைக்க, அடுத்து 20 நாட்களில் இயல்பாக பெண்ணுக்கு வர வேண்டியது வராமல் போக, முத்தம் கொடுத்ததால் தான் கர்ப்பம் என்று குழம்பும் ரஞ்சனிக்கு, ராஜிக்கா வந்து விளக்கம் கொடுக்க, பெண்ணுக்கு விடலை தெளிவதாகக் கதை.

முத்தம்-னாலே காண்ட்ராவர்ஸிதான். அது இங்கேயும் உண்டு. கதையின் கரு எங்கோ படித்த ஞாபகத்தினை தூண்டுவது தவிர்க்க முடியாதது. நடையில் விறுவிறுப்பு.

மனமுதிர் காலம் - பழைய கள், புதிய மொந்தையில்..

பொடிப்பையா

2006-06-21T00:50:00.000-07:00

பொடிப்பையா

பொடிப்பையன் என்று முதலாளியால் அழைக்கப்படுவதை வெறுக்கிறான் மௌலானா. குறிப்பாக, நஃபீஸா வருகையில், யாராவது 'பொடிப்பையன்' என்று கூப்பிட்டால், நொந்து போகிறான். இந்த நினைவில் ஆரம்ப்பிக்கின்ற கதை, அந்தப் பையனின் பல்வேறு எதிர்காலக் கனவுகளை அசைபோடுகிறது. அவளும் உண்டு அவன் கனவில். கனவில் வாழ்ந்து கொண்டு இருக்கும் அந்தப் பையனை, அவன் அருகில் இல்லை என நினைத்து ஒரு நாள் நஃபீஸா 'அப்பா, உங்கள் பொடியன் எங்கே?' என்று வினவ, அது மௌலானா காதில் விழ, வெறுத்துப்போய் வேலையைவிடு, வெளியேறி இலக்கில்லா பாதையில் போவதாக முடிகிறது கதை.

மெல்லிய உணர்வினை அழுத்தமாகப் பதிந்திருக்கிறார். ஆனால், செப்புக்கம்பிகள் , மற்றும் 'பொடியன்' கடை சார்ந்திருக்கும் பணி குறித்த கதையாசிரியரின் வரிகள், நமக்கு நிறையவே தகவல்கள் தந்தாலும், அதுவே நம்மை கதையில் இருந்து சற்று எட்டியிருக்கச் செய்கிறது. அது மாதிரியான சில இடங்களைத் தவிர்த்திருந்தால், கதையின்னும் வலுப்பெற்றிருக்கலாம்.

'பொடிப்பையன்' - இலக்கிய நடை தோற்றத்தில்.

வளர் சிதை மாற்றம்!

2006-06-21T00:23:00.000-07:00

வளர் சிதை மாற்றம்!
'மாற்றங்களே வாழ்க்கை, பழையன போயி புதியன வரட்டும்' என்று சொல்லி,
வேலைதேடும் காலத்தில் 'விடலை தொலைந்து போயிருக்கும்' என்கிறார்.

விடலை தொலைந்தாலும், நினைவின் அசையில் வாழ்வினைக் கழிப்போம் என்று கவி பாடியிருக்கிறார்.

வளர்சிதை மாற்றம் - மெல்லிய கவியுணர்வில்.

விட்டில் பூச்சிகள்

2006-06-20T23:55:00.000-07:00

விட்டில் பூச்சிகள்

வாலிபத்தின் உரமேறிய முரட்டு இளைஞன், கல்லூரித் தகராறில் (எல்லாம் பெண்ணாலதான்) அவரின் அப்பாதான் இன்ஸ்பெக்டர் என்று தெரியாமல் (சற்று இடிக்கிறதா, அப்பாவின் மேல் வெறுப்பு, பையன் அப்பா பேரைச் சொல்லாமல் வாங்கிக் கட்டுகிறான்) ஏட்டையாவினால் பையன் விளாசித்தள்ளப்படுகிறான். அவரது அப்பா இன்ஸ்பெக்டராக இருக்கும் போலீஸ் ஸ்டேசனுக்கே இழுத்துச் செல்லப்படுகிறார். உண்மை தெரிய வர, அப்பா இன்ஸ்பெக்டர், போலிஸ் டிரைவர் சகாயத்தை கூப்பிட்டு பையனை வீட்டில் விட்டு வரச் சொல்கிறார். கிடைக்கின்ற நேரத்தில் சகாயம், தன் 'ஃப்ளாஷ்பேக்' கினைச் சொல்லி, அவர் அப்பாவின் எதிர்பார்ப்பினையும் சொல்லி, பையனின் விடலைப்பருவம் கலை..வதாகப் போகிறது கதை.

கனமான பதிவு. முரட்டு இளைஞன் பார்வையில் அவனுக்கே உரிய எகத்தாளத்துடன், கூடவே மெல்லிய நகைச்சுவையுடன் ஓடுகிறது.

"ஏட்டு! லத்தில போட்டுப் பின்னிட்டு ரெண்டு பரோட்டா வாங்கிக் கொடுத்ததை சொல்லி தப்பிச்சிக்கறாராம்! ஆனா காலைல சாப்புட்டது. ஏட்டு புண்ணியத்துல புரோட்டா அமிர்தமாத்தான் இருந்தது."

" 14 அரியரு வைச்சிருந்தா அவனெல்லாம் கிரிமினலா? அந்த நாயி சங்கரு கூட சேர்ந்தவொடனே நானெல்லாம் உருப்படாத பொறுக்கின்னு கண்டு புடிச்சிட்டா அந்த மேரிக்யூரி!"

முரட்டு இளைஞன் வழி ஒரு கதையும், சகாயம் வழியாய் உபரியாய் ஒரு கதையும் என இரண்டு கதை இணையப்பட்டிருப்பதால், சற்றே நீளமாய் இருப்பது போன்ற தோற்றம். ஆயினும் என்ன, மெல்லிய நகையும், முரட்டு கோபமும், அடியின் வலியில் ஏதும் செய்ய இயலாமையுமாக அந்த இளைஞனின் உணர்ச்சி வெளிப்பாடு நீட்சியைக் கட்டுப்படுத்திகிறது.

விட்டில் பூச்சிகள் - முழு நிறைவு!

வளர்சிதை மாற்றம் - உணர்ந்து கொண்டேன்

2006-06-20T23:18:00.000-07:00

வளர்சிதை மாற்றம் - உணர்ந்து கொண்டேன்

சிரத்தை எடுத்து புனையப்பட்ட விடலைப் பருவம் குறித்த கவிதையிது.

'க' வரிசையில் ஆரம்பித்து, அதிலேயே தொடர்ந்து, நட்டம்,கொட்டம், ஆட்டம், என்று பாடி, தந்தையின் மனம் நோவதைப்பார்த்து, வளர்சிதை மாற்றம் உணர்ந்ததாகச் சொல்கிறார்.

"கிளர்ந்துவிட்ட என் குறும்பால், பொறுக்காமல்,
வளர்ந்துவிட்ட என்னை ஒருநாள் கைநீட்டியதற்கு,
தளர்ந்துவிட்ட என்தந்தை மனம்நொந்த வேளையில்
உளர்ந்துவிட்ட என்னுள் நிகழ்ந்தது மாற்றம்"

கிளர்ந்துவிட்ட, வளர்ந்துவிட்ட, தளர்ந்துவிட்ட - வரைக்கும் சரி, 'உளர்ந்துவிட்ட' என்றால்?

சொல்வரிசை நன்றாக இருக்க, கருத்தாழம் கேள்விக்குறியாக!

எனக்கு நேர்ந்த வளர்சிதை மாற்றங்கள்

2006-06-20T23:11:00.000-07:00

எனக்கு நேர்ந்த வளர்சிதை மாற்றங்கள்

தன்னுடைய டீனேஜில் நிகழ்ந்ததைத் திரும்பிப் பார்த்திருக்கிறார்.

எனக்கு நேர்ந்த வளர்சிதை மாற்றங்கள் - Nothing Special!

விடைகொடு விடலைப் பருவமே

2006-06-20T22:50:00.000-07:00

விடைகொடு விடலைப் பருவமே

விடலைப்பருவம் எப்போ தன்னிடமிருந்து விடைபெற்றது என்பது குறித்து, அசை போட்டபடியே, செய்த விடலைத்தனங்களைச் கவித்திருக்கிறார்.

'அவளைப்' பற்றி அம்மாவிடம் சொல்லியபோதிலேயே விடலைப்பருவம் விடை பெற்றதாகச் சொல்கிறார்.

இளமைத்துள்ளலுடன் ஆர்ப்பரிக்கும், விடலைப்பருவத்தை அடக்கி வாசித்திருக்கிறார்!

விடைகொடு விடலைப் பருவமே.. - கனித்தமிழில்.

அன்புள்ள டைரி

2006-06-20T01:35:00.000-07:00

அன்புள்ள டைரி

'ஆளவந்தான்' திரைப்பட வரிகளை நினைவு படுத்தும் விதமாக 'அன்புள்ள டைரி' என்று ஆரம்பிக்கும் கதாசிரியர், அந்த வயது விடலைச் சிறுவனின் ஆர்வங்களை அழகாய்ப் பதித்திருக்கிறார். புதிய பேனா, சைட் அடிக்கக் கற்றுக் கொள்வது, சந்தியாவிடம் பேசும் ஆசை, சந்தியா அமலா ஜாடை என அங்கங்கே சுவாராஸ்யமாக, ஒரு விடலையின் நாட்களை வித்தியாசமாகப் பதித்திருக்கிறார்.

மாறுதல் ஏற்பட்ட தருணம் எது எப்போது போன்ற சமாசாரங்கள் எல்லாம், டைரியில் இல்லாது போனாலும், படிக்க சுவாரஸ்யமாக இருப்பதென்னவோ உண்மை.

அன்புள்ள டைரி - படிக்க சுவாரஸ்யம்.

..25, ..50, ..75, ..00, ..25

2006-06-20T01:18:00.000-07:00

..25, ..50, ..75, ..00, ..25

வளர்சிதை மாற்றம் - தாயின்பார்வையில் என்ற சப்-டைட்டிலோடு (முன்னெச்சரிக்கையோ?!!) தொடங்குகிறார்.

ஒவ்வொரு கால கட்டத்திலயும், 1925-லிருந்து 2025 வரை தாய் தங்கள் மகள்களை, விடலைக்காலப் பருவத்தில் எப்படி கண்காணிக்கிறார்கள் என்பதனை மையமாகக் கொண்டு எழுதியிருக்கிறார், எல்லாக் காலத்தும் தாய்மார்கள், எச்சரிக்கையுணர்வுடனேயே இருப்பார்கள் என்ற எண்ணத்தினை வலியுறுத்தி.

கதையின் காலமும், கதாபாத்திரங்களும், உரையாடல்களும் நேர்த்தியான பின்னல்களுடன் பின்னப்பட்டிருப்பதில் கதாசிரியரின் தெளிவு தெரிகிறது.

ஊரெங்கும் விடலை - வளர்சிதைமாற்றம் என்றவுடன், செக்ஸ் புத்தகம், சொப்பனம், விரயம், காதல், மயக்கம் என்று அசைவங்கள் பரிமாறப் பட்டுக் கொண்டு இருக்கையில், சுத்தமாய் ஒரு சைவச் சாப்பாடு அழகாய்ப் பரிமாறப் பட்டு இருக்கிறது.

அது சரி, எல்லாக் காலத்து தாய்மார்களும் மகளை எச்சரிக்கை உணர்வோடு பார்க்கையில், தந்தையினம் மட்டும் எப்படி நம்பிக்கையாய்ப் பார்க்கிறது? இது இயல்பா அல்லது தாய்மையின் எச்சரிக்கையுணர்வை அதிகப்படுத்த கையாண்ட உத்தியா?

..25, ..50, ..75, ..00, ..25 - நேர்த்தியான கதைப்பின்னலில்!

தகிக்கும் தேகம் - விழிப்புணர்வு!

2006-06-20T00:44:00.000-07:00

தகிக்கும் தேகம்

விடலையின் பருவத்தில் தோன்றும் 'அடல்ட்ஸ் ஒன்லி' புத்தக மோகத்தைப் பின்னனியாக எடுத்துக் கொண்டு புறப்படுகிறது கதை.

நல்ல படிக்கிற பையனான 'சூர்யா'விற்கும், அடல்ட்ஸ் ஒன்லி புத்தகம் படிக்கிற ஆசை வந்துவிட, திருட்டுத் தனமாக படிக்க விழைகிறான். ஆனால், சந்தர்ப்பவசத்தால், அது ஆசிரியரின் இருக்கைக்கு பின்னால் போய் விழுந்து, ஆசிரியர் அதைப் பார்த்துவிட, அவனது 'நல்ல பையன்' இமேஜ் போய்விடுமோ என்ற பயம், ஆசிரியரின் அறிவுரையின் பால் விழுந்த விழிப்புணர்வு வளர்சிதை மாற்றமாக முடிகிறது.

"அட்டெண்டென்ஸ் எடுத்து முடித்து பாடத்தை துவக்கியிருந்தார் ஆசிரியர். சுப்ரமணி 'தகிக்கும் தேகத்தை'-க் காணவில்லை என சக மாணவரிடையே குசுகுசுப்பது சூர்யாவின் காதில் விழுந்தது. ஆயினும் அவன் கவனமோ, இடுக்கில் மாட்டிக்கொண்டு 'கால்வாசி தெரியும் அந்தப்புத்தகம் ஆசிரியர் கண்களில் பட்டுவிடக்கூடாதே' என்ற கவலையில் இருந்தான். அவ்வப்போது வசந்தியையும் பார்த்துக் கொண்டான்"

கதைச்சூழலையும், பள்ளிச் சிறுவனின் மனநிலையையும் நன்றாகவே படம் பிடித்துக் காட்டி இருக்கிறார் கதாசிரியர்.

தகிக்கும் தேகம் - விடலையின் கிளுகிளுப்பில்!

மாறித்தான் ஆகனுமா?

2006-06-20T00:20:00.000-07:00

மாறித்தான் ஆகனுமா?

விடலையின் ஆரம்ப பந்தாவான, நண்பனின் காதலுக்கு துணைபோகுதலில் ஆரம்பித்து வலிய வந்த தேவதைக்கு 'நிஜத்தை' புரிய வைத்த கணம் வரை விடலைக்குறும்புகளை பிசிறில்லாமல் கோர்வையாய் இனிமையாகப் பகிர்ந்திருகிறார் ஆசிரியர். +2 படிக்கும் பையனுக்கு ஆலோசனை, நிலம் பார்ப்பது என மெல்ல விடலைப்பருவம் தாண்டி வருவதையும் உணர்ந்தவர், அதை விட மனமில்லாமல், அத வச்சுகிட்டே வாழ்வேனென்கிறார்.

இயல்பான நடையில் ஒரு சுய அனுபவப் பதிவு!

பைபை அடாலசன்ஸ் - நடையழகு!

2006-06-19T23:51:00.000-07:00

பைபை அடாலசன்ஸ்

'கோக்கு மாக்காக கேள்விகள் கேட்பது 'poetic license' என்று கவிப்பேரரசுவை வம்பிக்கிழுது, சுஜாதாவின் 'நிலாநிழலுக்கு' வக்காளத்து வாங்கி, ஐந்தாம் வகுப்பு டீச்சரின் அழகில் 'ஆட்டோகிராப்' பாடி நகரும் இந்தக் கட்டுரை, டீனேஜ் 'பருவத்தில், படிப்பின் மீது காட்டப்படுகிற அக்கறையும் அக்கறையின்மையும் தான் சில வருடங்கள் கழித்து, நம்முடைய pay scale என்ன என்பதை நிர்ணயிக்கப் போகிறது.' என்று 'பஞ்ச்' டயலாக்குகளையும் உள்ளடக்கிப் பயனிக்கிறது.

வேகமான நடையில், இலேசான கட்டுரை.

பைபை அடாலசன்ஸ் - இளமை.

முற்றுப்புள்ளியிலிருந்து...

2006-06-19T23:07:00.000-07:00

வளர்சிதைமாற்றம் - முற்றுப்புள்ளியில் இருந்து தொடங்கும் கதைகள்

விடலைக்கால கனவிலிருந்து, திருமண வாழ்வினைக் கனா கண்டு நல்ல பிள்ளையாய் இருந்து வரும் பையனுக்கு, ஏற்கனவே இன்னொருவனைக் காதலித்த பெண் மணமகளாய் வாய்ப்பதும், அதனை அவள் முதலிரவிலேயே அவனிடம் சொல்ல, பையன் மனம் விசனப்பட, அறிந்து கொண்ட அம்மா, தானும் அந்தப்பெண் போலவே அவன் அப்பாவிற்கு வாக்கப்பட்டதைக் கூறி, அந்தப் பெண்ணை ஏற்றுக் கொள்ளச் செய்வதாகப் போகிறது கதை.

சுருங்கச் சொல்லவேண்டிய கதையினை, மிக நீளமாகக் கொண்டு போயிருப்பதால், இடைஇடையிடேயே சோர்வடைகிறது. அக்காவின் பாத்திரம் இயல்பாக படைக்கப்பட்டு இருக்கிறது. இருப்பினும், மணப்பெண்ணை வித்தியாசமாக நடக்கச் சொல்வதாக எழுதியிருப்பதை எல்லாம் தவிர்த்திருக்கலாம்.

"ஒரு சிகரெட்டை எடுத்து பற்ற வைத்தேன். பன்னிரெண்டாம் வகுப்பில் பிடித்தது பிறகு இப்பொழுதுதான் பிடிக்கிறேன். அதுவும் செய்து கொண்ட கல்யாணத்தால் பிடிக்கிறேன் என நினைக்கும் பொழுது மீண்டும் கோபம் தான் வந்தது."

'பன்னிரெண்டாம் வகுப்புக்கு அப்புறம், இப்பொழுதுதான் - முதலிரவில்தான் நாயகன் சிகரெட் பிடிக்கிறான்'. பன்னிரண்டாம் வகுப்புக்கு அப்புறம் சிகரெட்டே தொடாதவன், கல்யாணக் கனவில் மூழ்கியிருப்பவன் - மணப்பெண்ணின் முந்தைய காதல் வாழ்க்கையைப் பற்றி ஏற்கனவே அறிந்திராதவன் - பர்ஸ்ட்நைட்டில் சிகரெட் பிடிப்பது.. சறுக்கல்.

முற்றுப்புள்ளி - முழுப்புள்ளி அல்ல.

வளரிளமைக் காலம் - தகவல் திரட்டு!

2006-06-19T22:34:00.000-07:00

வளரிளமைக் காலம்

'வளரிளமைக்காலம்' என்று விடலைப்பருவத்திற்கு, கவித்துவமாக ஒரு டைட்டிலைக் கொடுத்து எழுதப்பட்ட ஒரு கட்டுரை. தலைப்பினைப் போலவே சொல்லப்பட்டிருக்கும் கருத்துக்களும் அழகாகவே இருக்கிறது.

விடலைப்பருவ மாற்றம் நிகழும் காலம் இதுதான் என்று அறுதியிட்டுக் கூற முடியாது என்கிறார் கட்டுரையாளர். இப்போட்டியில் பங்கு பெற்று இருக்கும், சில அனுபவ நிகழ்வுகள் இதனை நினைவு படுத்துவது, கட்டுரையாளரின் ஆழ் சிந்தனைக்குச் சான்று..

இந்தக்காலத்தில் உணர்வன என்ன என்ன என்று விவரித்திருக்கிறார்.

"மற்றுமொரு கற்றல் இரட்டை வாழ்க்கை வாழ்வது எப்படி என்ற ஒரு கலை. சமுதாயத்திற்கென்று ஒரு முகமும், தனக்கென்று ஒரு முகமும் கொள்வது எப்படி என்ற பாடம்" - அழகான வரிகள்.

விடலையின் குறும்பும், பரபரப்பும் இல்லாமல், அறவுரையாக கட்டுரை நிகழ்ந்திருப்பது கட்டுரையாளரின் மன முதிர்வினைக் காட்டுகிறது. (மனமுதிர்காலம் - என்ற தலைப்பு கூட இந்தக் கட்டுரைக்குப் பொருந்துமோ? :) )

வளரிளைமைக் காலம் - நல்லதோர் தகவல் திரட்டு.

விடலைக் காலத் தளைகளே போ போ போ

2006-06-18T01:32:00.000-07:00

விடலைக் காலத் தளைகளே போ போ போ

விடலைக்காலப் பருவத்தில், தன் செய்கைகளை நினைத்து வருந்துகிற ஒரு சுய அனுபவப் பதிவு.

பெட்டி தூக்க 'பிரஸ்டீஜ்' பார்த்தது, மற்றோர் முன்னால் பெற்றவர்களை மதியாமல் நடந்தது என தன் நிகழ்வுகளைப் பதித்து, வருத்தங்களைப் பகிர்ந்து கொண்டிருக்கிறார். பதிவு முழுக்க அந்த சோகம் தெரிகிறது.

அன்னை இந்திராகாந்தி படுகொலையின் போது, நண்பனின் வீட்டில் தங்கிய போது, நண்பனின் அம்மா காட்டிய பாசம், நண்பர்களின் அரவணைப்பு இவையே தன்னை உணரச் செய்ததாகக் கூற விழைகிறார்.

விடலைக் காலத் தளைகளே போ போ போ - சோகத்தின் நிகழ்வில்.

காதல் வளர்சிதை மாற்றம்

2006-06-18T01:03:00.000-07:00

காதல் வளர்சிதை மாற்றம்!

காதலியின் தற்செயலான விழித்தீண்டல் தன்னுள் புதைந்திருந்த, கவிஞனை உணர்த்திய 'Personal' நிகழ்வாக, காதல் வளர்சிதை மாற்றமாகப் படைத்திருக்கிறார்.

விடலைக்கால குறும்புகளோ, கனவுகலோ கவிதையில் காணப்படாவிட்டாலும், இருண்ட கிணத்தில் கசியும் நீர்த்தாரைகள், இலையுதிர்ந்த மரத்தில் நிழல் தேடும் குருவி என்ற உவமைகளில், விடலைப்பருவம் இல்லாததை இருப்பது போல் தேடும் என்று குறிப்பால் உணர்த்துகிறாரா?

இன்னும் கொஞ்சம் விரிவாகச் சொல்லியிருக்கலாமோ?

காதல் வளர்சிதை மாற்றம் - வார்த்தை ஜாலத்தில்!.

கனா காணும் காலங்கள்

2006-06-18T00:30:00.000-07:00

கனா காணும் காலங்கள்

'டியூஷனுக்குச் சென்ற பெண்ணைக் காணோம்' என்ற பரபரப்புடன் 'டாப் கியரில்' தொடங்குகிற 'கனா காணும் காலங்கள்', கதையோ என்று நினைக்க வைத்து, டக்கென்று தன்னைவிட வயது மூத்த பெண்ணிடம் காதல் கொள்ளும் கல்லூரி இளைஞனை அறிமுகம் செய்து கட்டுரை என்ற உணர்வினை உணர்த்தி, விடலைப் பருவத்துக் காதலை சித்தரிக்கும் சினிமாக்களைச் சுட்டி(அல்லது திட்டி?!), காதல் என்ற ஒன்றே இல்லை, காமம் தான் காதலாகச் சொல்லப்பட்டுக் கொண்டிருக்கின்றது என்று 'இடக்கரடக்கலை' முன்வைக்கிறார்.

'இயற்கை உணர்வுகளுக்கு மாறுபட்டு வாழ்வது ஒரு சாடிஸம்' என்று தத்துவார்த்தமாகப் பேசி, பின் விடலையர்களின் காதல் தோல்விக்கு அட்வைஸ் செய்து, அனிதாவை அறிமுகம் செய்து 'நீங்கள் காதலிக்கீறீர்களா?' என்று கேட்கிறார்.

விளம்பரப் படம் போல காட்சிகள் டக்டக் என்று மாறுவதால், ஒட்ட முடியாது போகிறது.

விடலைக்காதல்தான் காமம் என்கிறாரா? இல்லை விவரமானவர் காதலும் இடக்கரடக்கல்தான் என்கிறாரா? புரியவில்லை!!!.

பண்டிகைக் காலங்களில் வானில் கொளுத்தப்படும் 'வாணவேடிக்கையின் தீப்பொறிகள் தெறிப்பதைப் போல' விடலையிலிருந்து - bye-bye விடலை வரை எல்லாப் பக்கத்தையும் நோக்கி கட்டுரை பயணிக்கிறது.

பொறிகள் தெரிகிறது. மையம் தெரியவில்லை.

கனா காணும் காலம் - சற்றே குழம்பிய நிலையில்.

ஒரு அனானிமஸாரின் வேண்டுகோள்?...

2006-06-17T13:54:00.000-07:00

"அண்ணாச்சி இல்லை அக்காச்சி, இதை இப்படியே நிறுத்துக்கோங்க. இது நல்லாயில்லை, இது தேவையுமில்லை. நீங்க சொல்வதை வைத்து யாரும் ஒன்றும் போட்டுவிடப்போவதில்லை. அவரவர்களுக்கான அரசியல் அவரவர்களுக்கு, அவரவர்களுக்கான ஒட்டு அவரவர்களே போடவேண்டும். இதில் விமர்சனங்கள் இந்த மூன்றாவது கண் என்ற பெயரில் தேவையில்லை.இது உங்கள் சொந்தப்பெயரில் செய்வதென்றால் எந்த ஆட்சேபணையும் இல்லை. மற்றபடிக்கு இந்தப் போட்டியை திசைதிருப்ப வேண்டாமென்று கேட்டுக்கொள்கிறேன். இப்போதைக்கு அனானியாக. வேண்டுமானால் பின்னர் பெயருடனும். ''

அய்யா/அம்மா அனானிமஸ்,

இந்த மூன்றாவது கண், நான் (செந்தில்), பாலா, பாலாஜி என்ற மூன்று நண்பர் குழு. முதலில் மூன்று கண்கள் என்றுதான் தலைப்பிட நினைத்தோம். அப்புறம்தான், மூன்றாவது கண் என்று வைத்தோம். (வர இருக்கின்ற பதிவுகளில், இது குறித்துச் சொல்லலாம் என்ற எண்ணமும் உண்டு)

எந்தத் திசை திருப்பலுக்கும் ஆசைப்பட்டு இந்த வழி வரவில்லை. எங்கள் விமரிசனங்கள் தான் வோட்டினைத் தீர்மானிக்கப் போகிறது என்று எண்ணவும் இல்லை.

எந்தப்பதிவும் இன்னும் வரவில்லை, அதற்குள் எப்படி இந்த முடிவு? ஏனிந்த குற்றச்சாட்டு அனானிமஸ் ?

நீங்கள் போட்டியில் பங்கு கொண்டு உள்ளவராகக் கூட இருக்கலாம், தெரியவில்லை, எதற்கு இந்த அனானிமஸ் வேடமென்று. இருப்பினும், உங்கள் கருத்தினை வாசகர் பார்வைக்கு வைக்கிறோம்.

'எங்கள் கருத்துக்கள் போட்டியை திசை திருப்பும் என்று எண்ணுவீர்களென்றால், அதுவே அனைவர் கருத்தாக இருக்கும் பட்சத்தில்,
தற்போது நிறுத்தி, போட்டியின் முடிவிற்குப் பின்னால் தொடர்கிறோம்'.

வாசகர்களே..உங்கள் கருத்துக்களை, வெளிப்படையாகவே பேசலாம்.. அனானிமஸ் உருவம் வேண்டாம்...

- பாலா-செந்தில்-பாலாஜி.

இதுவரை 22..

2006-06-17T00:18:00.000-07:00

போட்டியின் ஆரம்பவாரங்கள், வெகு சில பதிவுகளுடன் மிக மெதுவாகவே நகர்ந்தாலும், இறுதிக்கட்டம் நெருங்க நெருங்க வேகமாக வளர்கிறது. முதலில் பதிவு செய்தவர்களின் படைப்புக்கள் 'வளர்சிதை மாற்றத்தின்' அர்த்தத்தில், ஒரு தெளிவைக் கொடுத்து, பின் வருபவர்களுக்கு ஒரு உத்தியைக் காட்டியிருக்கலாம்.

இதுவரை வந்திருக்கும் பதிவுகள் 22.. கண்டிப்பாக கால் சதத்தைத் தாண்டும் என எதிர்பார்க்கலாம்.

அதிக படைப்புகள் வேண்டும் என எதிர்பார்த்த 'பினாத்தலாரின்' ஆசை நிறைவேறியிருக்கிறது.

இருபத்தியிரண்டையும் 'நுனிப்புல்' மேய்ந்திருக்கிறோம். வருகின்ற இருதினங்களில், 'ஃபுல்' லையும் மேய்வோம்.

வந்திருக்கும் பதிவுகளைப்படிக்க..

http://www.thenkoodu.com/contestants.php

ஜுன் மாத போட்டித் தலைப்பும், குழப்பங்களும்

2006-06-16T23:44:00.000-07:00

சென்ற முறை வெற்றி பெற்ற 'பினாத்தல்'சுரேஷ் போட்டிக் களத்திற்கு கொடுத்திருந்த தலைப்பு 'வளர்சிதை' மாற்றம் - bye-bye adolocense. அதற்கான விளக்கங்களும், தெளிவாகவே கொடுத்திருந்தார். அவரது விளக்கம் கீழே.

"வெவ்வேறு சூழல்களில், நாடுகளில், பணிகளில் இருந்தாலும் நாம் அனைவரும் தினமும் சந்திக்கும், பாதிப்புக்குள்ளாகும், நம் பார்வைகளையும் குணநலன்களையும் புரட்டிப்போடும் ஒரே பொது நிகழ்வு - மாறுதல்.

அதிலும் எல்லாரும் சந்தித்திருக்கக்கூடிய முக்கியமான மாறுதல், விடலைப்பருவம் விடைபெறும் தருணங்கள்.

இத்தருணங்கள் நம் சிந்தனாமுறைகளை, அணுகுமுறைகளை, கொள்கைகளைப் புரட்டிப்போட்டு விடுகின்றன. எதற்கும் கவலைப்பட்டிராமல் இருந்த இளைஞன் / இளைஞி, பொறுப்பேற்று, குடும்பத்தின் கொள்கைகளை வகுக்கத் தயாராகும் மாற்றம், வெளிப்பார்வைக்குச் சாதாரணமான நிகழ்வாக இருந்தாலும், தனிப்பட்ட நபரின் சரித்திரத்தில் மிக முக்கியமான தருணம்.

இத்தருணம் வலியால் ஏற்பட்டிருக்கலாம், சந்தர்ப்பங்களால் ஏற்பட்டிருக்கலாம், கலவரங்களால் ஏற்பட்டிருக்கலாம், அறிவுரைகளால் ஏற்பட்டிருக்கலாம், காதலால் ஏற்பட்டிருக்கலாம் - இது ஒரு Personal நிகழ்வு."

சில படைப்பாளிகள், இதனை கவனத்தில் கொண்டு எழுதியிருக்கிறார்கள். சிலர், படித்த மற்ற படைப்புகளின் தாக்கத்தால் எழுதி, பினாத்தலாரின் வரையறையை கண்டு கொள்ளாமல் விட்டு விட்டார்கள் அல்லது குழம்பி விட்டார்கள் என்று தோன்றுகிறது. (தேன்கூடு 'வளர்சிதை மாற்றம்' தலைப்பினை, hyperlink- ஆகக் கொடுத்து, அது பினாத்தலாரின் இடுகைக்கு இட்டுச்செல்லுமாறு செய்து இருக்கலாம். அடுத்தமுறை கவனிப்பார்களாக.) எது எப்படியாயினும், இம்முறை வாசகர்களின் பங்களிப்பு மிக உற்சாகத்துடன் இருக்கிறது. இது தமிழுக்கு நல்லது. களை கட்டும் போட்டி.

இன்னும் நான்கு நாட்கள்தான் இருக்கிறது, படைப்புகள் சமர்ப்பிக்கப் பட..

ஆர்வம் இருப்பவர்களுக்கு, இன்னமும் அவகாசம் இருக்கிறது. கடைசி பந்தில் வந்து 'சிக்ஸர்' அடிப்பவர்களும் இருக்கிறார்கள். அவர்களையும் வரவேற்கிறோம். வாங்க, போட்டித் திருவிழாவி மழையில் நனைவோம்.

- மூன்றாவது கண் விமர்சனக்குழு

முன்னுரை

2006-06-16T08:47:00.000-07:00

தேன்கூடும், தமிழோவியமும் இணைந்து நடத்தும் போட்டி படு ஜோரா போய்க்கிட்டு இருக்கு. புதிய, பழைய என எல்லா எழுத்தார்வலர்களும் பங்கு கொண்டு நல்லா எழுதிகிட்டு இருக்காங்க.

இவ்வளவு படைப்புகள் இருந்தா, ஓட்டு போடற சனம் குழம்பிடாதா? அதான் இந்த மாதிரி போட்டிகளுக்கு வரும் படைப்புகளுக்கு எல்லாம் ஒரு முன்னோட்டம் கொடுத்துட்டு, அப்படியே சைடுல ஒரு 'மூணாம் மனுசனோ'ட கருத்தையும் சொல்லலாம்னுதான், இந்த பதிப்பு.

யாரையும் குறை கூறும் நோக்கமல்ல எங்களுக்கு. எங்கள் ரசனையின்பால் பட்டதைச் சொல்லப்போகிறோம். படைப்பாளர்கள் தப்பா எடுத்துக்க கூடாது. பாசிடிவா எடுத்துக்கோங்க -ன்னு கேட்டுக்கறோம்.

- மூன்றாவது கண் விமர்சனக்குழு